ကျပ်သိန်း ၅၀၀ နှင့် ၇၀၀ ကြားရွေးချယ်သင့်သည့် SUV ကား Honda Vezel

မိုဒယ်မြင့် SUV တစ်စီးဖြစ်တဲ့ Honda Vezel ကို Subcompact Crossover SUV တစ်စီးအဖြစ် Honda ကုမ္ပဏီကနေ ၂၀၁၃ ခုနှစ် နှစ်ကုန်ပိုင်းမှာ စတင်ထုတ်လုပ်ခဲ့ပါတယ်။ Vezel ကို New York Auto Show မှာ မိတ်ဆက်ပြသခဲ့ပြီး ဥရောပနဲ့ အမေရိကန်မှာ Honda HR-V အနေနဲ့ ရောင်းချခဲ့ပါတယ်။

ဒီကားက HR-V ရဲ့ ဒုတိယမျိုးဆက်လို့ ပြောမယ်ဆိုရင် မမှားပါဘူး။ Honda ကနေ Vezel ကို Ubran SUV အနေနဲ့ ထုတ်လုပ်ခဲ့ပြီး Vezel ဆိုတဲ့ စကားလုံးကို 'Bezel သွေးထားတဲ့ ကျောက်မျက်ရတနာ မျက်နှာပြင်' ဆိုတဲ့ အဓိပ္ပါယ်ရပါတယ်။ ဒါကြောင့် ရှေ့စာလုံး B နေရာ Vehicle နဲ့ အစားထိုးပြီး Vezel လို့ အမည်သတ်မှတ်ခဲ့တာဖြစ်ပါတယ်။

အင်ဂျင်အမျိုးအစား

Honda Vezel ကို ၁၅၀၀ စီစီ အင်ဂျင်တစ်မျိုးတည်းနဲ့ ထုတ်လုပ်ထားပြီး 2WD ၊ 4WD အင်ဂျင်နဲ့တင်မက Hybrid အင်ဂျင်နဲ့လည်း ထုတ်လုပ်ထားပါတယ်။ ချက်စီအနေနဲ့ခွဲမယ်ဆိုရင် ရိုးရိုးအင်ဂျင် 2WD က RU1 ၊ 4WD က RU4 ဖြစ်ပါတယ်။ Hybrid အင်ဂျင်မှာ 2WD က RU3 ဖြစ်ပြီး 4WD က RU4 ဖြစ်ပါတယ်။ ရိုးရိုးအင်ဂျင်မှာ G ၊ X ၊ S ဂရိတ်တွေရှိပြီး G ဂရိတ်မှာ 2WD ၊ 4WD နှစ်မျိုးရှိပေမဲ့ X ၊ S ဂရိတ်တွေမှာတော့ 2WD တစ်မျိုးတည်းကို ထုတ်လုပ်ထားပါတယ်။

ဈေးနှုန်း

Honda Vezel ကို Hybrid နဲ့ လူကြိုက်ပိုများပြီး ၂၀၁၃ ၊ ၂၀၁၄ မိုဒယ် ကားတွေရဲ့ ဈေးက ရန်ကုန်လိုင်စင်နဲ့ နယ်လိုင်စင်၊ ကားအရောင်နဲ့ အက္ခရာ၊ ဂရိတ်တွေအပေါ်မူတည်လို့ ကျပ်သိန်းခြောက်ရာကနေ ခုနှစ်ရာကြား ရှိပါတယ်။

အပြင်ပိုင်းနှင့် အတွင်းခန်းအပြင်အဆင်

Honda Vezel က SUV အမျိုးအစားဖြစ်တဲ့အတွက် ငါးယောက်စီး တံခါးငါးချပ်က ပုံမှန်အတိုင်းဖြစ်ပြီး နောက်တံခါး နှစ်ချပ်ကတော့ Nissan Juke လို အဖွင့်/အပိတ်လက်ကိုင်က တံခါးထောင့်မှာရှိတဲ့အတွက် ရုတ်တရက်ကြည့်မယ်ဆိုရင် တံခါးနှစ်ချပ်လို့ ထင်ရပါတယ်။ G ဂရိတ်က Base Grade ဖြစ်တဲ့အတွက် Cruise Control မပါသလို Leather Seat နဲ့လည်း ရရှိမှာမဟုတ်ပါဘူး။ X ဆိုရင်တော့ Side Airbag ၊ Led Headlight နဲ့ Cruise Control စတာတွေပါသွားပါတယ်။ G နဲ့ X ဂရိတ်တွေမှာ အလွိုင်းဆိုဒ် ၁၆ လက်မဖြစ်ပြီး S ဂရိတ်ဖြစ်သွားရင် အလွိုင်းဆိုဒ် ၁၇ လက်မ ဖြစ်သွားပါတယ်။ S ဂရိတ်မှာ Paddle Shift နဲ့ Roof Rail ပါသွားပါတယ်။ Hybrid ဖြစ်ရင် နောက်မီးက LED မီးခွက် ဖြစ်သွားပါတယ်။ ဂရိတ်အားလုံးမှာ Push-start ၊ Steering Volume Control ၊ Digital Aircon(Touch Botton) ဖြစ်သွားပါတယ်။